Etter nokre veker med sommarferie, startar vi opp igjen på onsdag 30.juli med ein stemningsfull visekonsert i Rosekyrkja med vokalist og trompetist Ole Jørn Myklebust og hans «Viser frå Eidsdal».
Ole Jørn er nok mest kjend frå sitt lange samarbeid med Mari Boine og Jonas Fjeld, samt ei rekke eigne soloalbum og musikkprosjekt for teater, tv og film. I 2016 gav han ut den kritikarroste viseplata «Gløymde fotefar – Viser frå Eidsdal», og i 2020 kom oppfølgjaren «Heimbygda mi». På desse platene har han tonesett dikt av sambygdingen Arne O. Storås. Konserten i Rosekyrkja kjem i hovudsak til å bygge på desse to platene.
Med seg på konserten har Myklebust strengemagikaren Tore Bruvoll, kjent frå bandet Hekla Stålstrenga og for samarbeid med til dømes Sondre Bratland, Annbjørg Lien og Ola Bremnes. Bruvoll vil traktere både elektriske og akustiske gitarar. Ole Jørn lovar ein konsert med mykje stemning og humor, vakre viser og lune historier frå heimbygda.
Så slår vi til allereie laurdag 2.august med eit etterlengta gjenhøyr med The Brazz Brothers. Dei var på besøk i Kyrkjehola i 2010, og det går enno gjetord om den fantastiske konserten!
The Brazz Brothers er en institusjon i norsk kulturliv. I løpet av 42 år med kontinuerleg drift har ensemblet spelt over 5000 konserter og turnert i 34 land. The Brazz Brothers har skapt sin eigen musikalske stil og sjanger. Unikt samspel, improvisasjon, originalitet og humor utført på eit teknisk høgt nivå, har ført til at ensemblet har blitt ei sterk merkevare der den enkelte sine kunstnariske uttrykk dannar grunnmuren i ensemblet. The Brazz Brothers har utgitt 25 album som har ei høg stjerne både blant publikum og presse. Vi kan love stor stemning, mykje god musikk og fantastiske musikalske prestasjonar i Rosekyrkja denne kvelden.
Og vi har ikkje tenkt å gi oss med dette! Helga etter, på laurdag 9.august, er det klart for ein av Norges beste soloartistar – uansett sjanger – i Rosekyrkja!
Jan Eggum trivst i dei fleste samanhengar; i stort band, lite band, viseduo, jazztrio, filharmonisk orkester – til og med saman med sangkor. Det er likevel noko heilt eige å oppleve Eggum åleine med gitaren, og gjerne i eit lite, intimt lokale. Dette kan du verkeleg få oppleve i Rosekyrkja denne kvelden, når Eggum kjem på besøk med turnéen sin; Observatør!
Med ein karriere som spenner over fleire tiår, har Jan Eggum skapt ein imponerande katalog av sangar som rører ved hjertet. Med sine djuptgåande tekstar har han oppnådd ein status som ein av Norges mest respekterte artistar og melankolikarar!
Han er klar til å trollbinde publikum med dei tidlause låtane sine. Og anten du er ein trufast fan eller aldri har opplevd han live før, så vil du ikkje bli skuffa! La deg rive med av Jan Eggum sin unike stil og lune humor, la deg fange av framføringane hans, anten det er dei melankolske balladane som treff deg rett i hjertet, eller dei meir oppstemte og fengande låtane som får det til å rykke i godfoten. Dette blir stas!
Søndag 17.august er det klart for ny konsert i Rosekyrkja. Då får vi storfint besøk av den svært anerkjente folkemusikaren Tone Hulbækmo – som også har vore på besøk i Kyrkjehola før. Det var i 2016 – då med «Hulbækmo & Jacobsen familieorkester». No kjem ho åleine med harpa si og den nyutvikla konserten «Harpedåm».
Tone var ein av dei første som tok opp igjen den gamle utdøydde harpetradisjonen i Norge. «Harpedåm» er ein solo instrumental harpekonsert som vekkjer til live ein folkeleg harpetradisjon som døde ut midt på 1800-tallet. Ingen veit sikkert kva og korleis dei spelte på instrumentet, så Tone har frå første stund skapt sin eigen spelestil, sin eigen teknikk, sin eigen tradisjon… Ho har også mykje å fortelje om bruken, om kildene, om harpa, og ho likar å skape kontakt med publikum også på det viset – men musikken står i høgsetet.
Å spele konsert med den gamle norske harpa nettopp i Rosekyrkja, med det gamle sagnet om Harpeberget ikkje langt unna, og i eit område der harpetradisjonen var levande ein gong, og der det også er bevart ei harpe frå, gir ein heilt eigen atmosfære.
Sidan vi starta med «vorspiel» i midten av juni, så er det på tide med eit «nachspiel» i slutten av august! Vi avsluttar 2025-sesongen på fredag 22.august – då inviterer Kyrkjehola kulturbeite til jazzkafe på Nilsgardstunet med «Kurt Sagen Jazz Kvartett».
Dette bandet har musikarar frå Ålesund, Haram og Molde; Sven Bernt Ellingseter på saksofonar, Miki Campins på slagverk, Erik Kristoffer Jenset på kontrabass/vokal og Kurt Sagen som bandleder og gitarist.
Sagen har i ei årrekke markert seg innan jazz og underhaldningsmusikk i regionen. Han har i si lange fartstid som musikar vore leiar og gitarist i kjende lokale band som «West Coast Swing», «Blue Horn Jazzband», «Intermezzo Duo», «Molvær/Sagen Trio» og «Møre Swing Band». Bandet spelar klassiske jazzlåtar, krydra med eigne arrangement. Dette er stemningsfull og iøyrefallande akustisk jazz for folk flest, og mange av melodiane blir framført i brasilianske rytme som bossa nova og samba.
Bli med oss å avslutte sommarsesongen med god stemning, god musikk og noko godt i glaset!
Vi starta sommarprogrammet 2025 allereie fredag 13.juni med eit «vorspiel» i Rosekyrkja. Då kjem Arill Riise og Runar Tafjord på besøk, og vi skal få eit spennande foredrag om Riise sin oppvekst i klyngetunet på Riise i Ørsta, akkompagnert av spesialskriven musikk av den anerkjente musikaren Runar Tafjord frå Sula.
Førestillinga har vi kalla “Der ingen var einsam – i ord, bilete og tonar”, og dette er altså ein utvida presentasjon av Riise si bok «Der ingen var einsam» som kom ut i 2024. Publikum vil bli kjent med sterke karakterar i bygda og høyre om barn som tidleg fekk kjensla av at dei var viktig arbeidskraft på gardane, og vi vil også få historier som ikkje kom med i boka – m.a. om den legendariske soknepresten Jacob Bantzbill og om ei mislykka kyrkjedekorering på Sæbø…
Og ikkje minst; vi får ei urframføring av nyskriven og fengslande musikk av Runar Tafjord – musikk som skal bygge opp under stemning og innhald i foredraget. Det er musikk med fjord og fjell i seg – frå eit liv i det som blir kalla “den norske landsbyen».
Dette samarbeidet er ei spesialforestilling for Kyrkjehola kulturbeite og heilt i tråd med ein av våre berebjelkar; å legge til rette for møte mellom ulike kunstformer.
